Çdo lavdërim dhe falënderim i përket Allahut, Zotit të botëve. Salati dhe selami qofshin për robin dhe të Dërguarin e Allahut, Muhamedin, për familjen e tij dhe mbi të gjithë shokët e tij!

Në këtë libër, fëmijët do gjejnë argëtim përmes ngjyrosjeve të shumta dhe njëkohësisht do hedhin hapat e parë drejt shkrimit, duke filluar nga vijat, për të vazhduar me shkronjat dhe fjalët. Ky libër është parë si shumë i përshtatshëm në praktikë, jo vetëm për lehtësimin e mësimit të leximit, por edhe si një mundësi e mirë të shfrytëzohet në shkencën e logopedisë, pra për fëmijët me probleme në të folur, të cilët duke ngjyrosur dhe shkruar, ushtrojnë shqiptimin e fjalëve të shumta të paraqitura me figura.

Libri plotësohet:

• duke shkruar vijat, shkronjat dhe fjalët përmes bashkimit të pikave,
• duke ngjyrosur figurat,
• duke ngjyrosur shkronjat e mëdha me një ngjyrë, ndërsa shkronjat e vogla me ngjyrë tjetër,
• duke rrethuar apo plotësuar shkronjat përkatëse në emërtimet e figurave (shkronjat e mëdha me një ngjyrë, ndërsa shkronjat e vogla me ngjyrë tjetër),
• duke vizatuar figura që fillojnë me shkronjat përkatëse,
• dhe duke iu shtuar stinëve karakteristika të tjera.

Në kuadër të këtij libri, vjen si dhuratë libërthi “T’ua mësojmë fëmijëve teuhidin!”.
Brenda libërthit fëmijët do njihen me bazën e fesë, pra teuhidin, dhe me disa dhikre të dobishme.